మహిళల టీ20 ప్రపంచకప్‌కు భారత జట్టు ఇదే.. సంచలన పేసర్‌కు తొలి అవకాశం!

జూన్ 12 నుంచి జరగనున్న 2026 మహిళల టీ20 ప్రపంచకప్ కోసం 15 మంది సభ్యులతో కూడిన భారత జట్టును బీసీసీఐ శనివారం ప్రకటించింది. హర్మన్‌ప్రీత్ కౌర్ కెప్టెన్ గా, స్మృతి మంధన వైస్ కెప్టెన్ గా వ్యవహరించనున్నారు. ఈ జట్టులో వికెట్ కీపర్ యాస్తిక భాటియా, స్పిన్నర్ రాధా యాదవ్ పునరాగమనం చేయగా, డబ్ల్యూపీఎల్‌లో సత్తా చాటిన యువ ఫాస్ట్ బౌలర్ నందిని శర్మకు అనూహ్యంగా తొలిసారి అవకాశం దక్కింది. కెప్టెన్ హర్మన్‌ప్రీత్ కౌర్, చీఫ్ సెలక్టర్ అమితా శర్మ ఈ వివరాలను మీడియా సమావేశంలో వెల్లడించారు.

మోకాలి శస్త్రచికిత్స కారణంగా 2025 వన్డే ప్రపంచకప్‌కు దూరమైన యాస్తిక భాటియా, పూర్తిగా కోలుకుని తిరిగి జట్టులోకి వచ్చింది. గత ఏడాది ఇంగ్లండ్ సిరీస్‌లో రాణించిన రాధా యాదవ్ కూడా స్క్వాడ్‌లో చోటు దక్కించుకుంది. ఇక, డబ్ల్యూపీఎల్ 2026లో హ్యాట్రిక్ సాధించి సంచలనం సృష్టించిన నందిని శర్మ, జట్టు పేస్ బౌలింగ్‌ను బలోపేతం చేయనుంది. సీమ్ బౌలింగ్ ఆల్‌రౌండర్లు అమన్‌జోత్ కౌర్ (వెన్నునొప్పి), కష్వీ గౌతమ్ (మోకాలి గాయం) దూరం కావడంతో నందినికి ఈ అవకాశం లభించింది. తెలుగమ్మాయిలు శ్రీ చరణి, అరుంధతిరెడ్డి కూడా వరల్డ్ కప్ జట్టుకు ఎంపికయ్యారు.

జూన్ 12 నుంచి జులై 5 వరకు జరగనున్న ఈ వరల్డ్ కప్ టోర్నీలో భారత్ గ్రూప్ 1లో ఉంది. ఆస్ట్రేలియా, దక్షిణాఫ్రికా, పాకిస్థాన్, బంగ్లాదేశ్, నెదర్లాండ్స్‌తో భారత్ తలపడనుంది. జూన్ 14న పాకిస్థాన్‌తో భారత్ తన తొలి మ్యాచ్ ఆడనుంది. 2020లో రన్నరప్‌గా నిలిచిన భారత్, ఈసారి ఎలాగైనా కప్ గెలవాలనే పట్టుదలతో ఉంది. ఈ ప్రపంచకప్ కంటే ముందు, మే 28 నుంచి జూన్ 2 వరకు ఇంగ్లండ్‌తో జరిగే మూడు టీ20ల సిరీస్‌లో కూడా ఇదే జట్టు ఆడనుంది.

భారత జట్టు: హర్మన్‌ప్రీత్ కౌర్ (కెప్టెన్), స్మృతి మంధన (వైస్ కెప్టెన్), షఫాలీ వర్మ, జెమీమా రోడ్రిగ్స్, భారతి ఫుల్మాలి, దీప్తి శర్మ, రిచా ఘోష్ (వికెట్ కీపర్), శ్రీ చరణి, యాస్తిక భాటియా (వికెట్ కీపర్), నందిని శర్మ, అరుంధతి రెడ్డి, రేణుకా సింగ్ ఠాకూర్, క్రాంతి గౌడ్, శ్రేయాంక పాటిల్, రాధా యాదవ్.